2015/01/20

坪洲半天遊

2014/10/12 
雖然係土生土長既香港人, 但係原來從來都未去過坪洲, 平時去離島來來去去都只係識得去長洲及南丫島, 不過近年假日每次去長洲或南丫島都係人山人海, 行山時人頭湧湧有如市區一樣, 所以都開始對呢兩個島失去興趣了. 想起平時搭船去離島時有一條航線去坪洲, 不如就會一會坪洲啦. 去坪洲既船分快船及普通船, 星期日兩款船既價錢足足相差一倍, 所以如果想搭普通船既就最好check定schedule. 雖然係星期日, 但船上既遊人寥寥可數, 相比於長洲或南丫島既船簡直係兩個世界, 快船約25分鐘就到達坪洲了. 

上岸後左手邊就係一個公園, 陶寶B見到公園就立即衝過去.

開始行山就開始自行放電, 你留吓力好喎.

玩夠就出發啦, 目標就係坪洲最高點"手指山". 
一家三口沿住坪洲海濱長廊行, 呢度沒有氣車, 人又少, 真係空氣都清新啲喔.

其實今日都幾熱吓, 曬到陶寶B眼都瞇埋呀.

沿途上沒有清楚既指示去手指山, 途經民居, 所以最好既方法都係問人, 路在口邊呀嗎. 
陶寶B近來開始唔鐘意自己行, 特別係當有嗲嗲在場時就更加要抱抱. 上手指山既路程有部份路係樓梯級, 因為陶寶B好鐘意行樓梯, 所以好彩佢都願意自己行, 勉強自己都行了一半上山既路程, 都算唔話得.
如果要嗲嗲抱足全程, 睇怕隻手立刻急性關節炎都似. 沿途相遇既行山遊人真係好少, 真係十隻手指數得晒, 非常喜愛呢一種寧靜呢.
因為咁樣先係行山郊遊, 如果多人到好似旺角咁, 不如唔好嚟行山啦, 難得香港700萬人口既地方還有一片清靜既樂土. 
不用40分鐘就到達了手指山, 雖然山頂不是好高, 但都已經可以遠望到愉景灣及迪士尼, 風景真係好靚. 
陶寶B咁辛苦行到上嚟山頂, 要食番條蕉補充吓體力先得.

兩仔爺好無聊玩推石, 莎拉無你地咁好氣呀!

休息過後就落山去搵嘢食lu! 坪洲內商店食鋪主要集中係永安街.

而上openrice 找尋食店最熱門的一定係祺森冰室及快車茶餐廳, 不過因為呢兩間鋪頭都店面細細又要等位, 拖住陶寶B一起實在沒有足夠既耐性了, 所以就隨便走進附近一間茶餐廳醫肚先了. 食飽飽見仲有少少時間, 就去買吓手信, 其實坪洲沒有什麼出名既手信, 之前聽聞有間老鋪賣既係自家製"芝麻餅", $3有一大塊香脆芝麻餅, 支持一吓呢啲有人情味既老鋪.

Bye bye坪洲啦, 我地下次再嚟啦.

話咁快就上船啦, 陶寶B開船後唔夠3分鐘就已經瞓著, 成為甜瞓寶寶!

2 comments:

  1. 好介紹呀!淘寶b大個左高左好多呀!

    ReplyDelete
    Replies
    1. weekend諗唔到同小朋友去邊, 坪洲真係一個唔錯既選擇

      Delete