Yahoo! Blog將關閉

今日中午自己個blog頂見到呢個重要事項時, 真係有啲激氣呀!!!

上一次約2年前, 已經因為yahoo blog要全面upgrade, 搞到我們一眾blog友人心煌煌, 因為好怕多年所寫下既心血會無晒, 所以紛紛自行作備份. 唉~~~估唔到今次仲大鑊, Yahoo Blog直頭執埋唔俾你玩啦, 真係吹脹!

其實自從上一次upgrade後, yahoo blog已出現好多毛病, 例如blog主自己reply啲comment時, 佢會同時send email俾翻blog主; 另外有人留言時, 未必會send email通知blog主, 就係呢兩樣已經令人煩厭!!!

雖然而家yahoo blog會提供back up及搬家服務, 但係又要搵過另一個blog site, 真係好煩.  同埋莎拉對Yahoo! blog真係有個情意結, 因為呢個blog記錄了自己由籌備婚禮到結婚當日, 再由有咗陶寶B到佢而家出世後既成長, 我用Yahoo blog記錄了呢一切, 因為怕有一日自己會忘記了呢.

雖然可以搬blog, 但係好怕同咁多blog友失散呢, 雖然莎拉唔知有幾多人會睇自己個blog, 但莎拉自籌備婚禮時已一真browse開一堆blog友, 如果第時大家唔再使用同一個blog site, 真係會lost contact呢. 真係諗起都有啲灰呀!!! 希望之前同陶寶B整既Fans page可以keep到同各blog友既聯係啦.

6月龍B生日會

莎拉雖然有加入啲BB會, 但一直都無參加過任何活動, 因為謝菲覺得一個人都唔認識, 所以唔多想參加. 雖然係咁但都有例外既. 莎拉提咗好多次, 想陶寶B參加6月龍B生日會, 最後謝菲都話好呢, 因為生日會地點係圓方, 比較近屋企, 所以今次無問題呢.



生日會係3:30pm開始, 第一次帶陶寶B見到咁多BB, 之前都有啲擔心佢會唔會失控. 搵個位座定定後, 就同同檯既BB打個招呼, 識吓女仔先得.
呢位靚女BB笑得好Sweet呀.



話晒都係生日一份子, 戴番頂生日帽開心吓先.



見到有個遊戲墊喎, 同陶寶B埋去8卦吓先. 嘩好多好多BB呀, 陶寶B係咁亂趴, 玩一陣就捉番佢先.



今次既活動搞手都係第一次搞BB會活動, 佢地好有心機佈置得好靚, 老實講, 要搞一個有50個bb再加家長既party真係一啲都唔易, 換轉莎拉就真係搞唔掂啦, 所以好佩服她們呢!







搞手仲安排咗啲兩個親子活動俾BB呢. 第一個就係親子Cookie, 今次就等謝菲出馬啦, 因為莎拉啲藝術細包係接近零. 陶寶B就被謝菲單手抱住, 之後另一隻手就畫陶寶B既一歲Cookie.



雖然係親子Cookie, 但其實陶寶B係幫唔到手(唔倒亂就已經好啦), 佢最合作就係乖乖地座係謝菲度就已經係最幫到手啦.



畫完塊Cookie, 食番啲嘢refresh吓先得. 今次既活動係包埋嘢食架, 有Nachos, buffalo chicken wing, mini burger, 真係唔錯架,



連陶寶B都要試吓個Mini Burger............個麵包!!!



另外仲每人包2杯drink添, 陶寶B同謝菲就係Bar度order嘢飲.



食過tea後就再玩第二個活動啦, 就係整手印, 陶寶B細個時都試過整, 不過今次一歲大就唔好似再似細個時唔反抗呢.



同佢印咗啲油係手掌度, 諗住按佢隻手落個畫框度, 點知佢揸實個拳頭係度反抗, 所以陶寶B人生既第一幅畫就係一幅好有深度抽象畫呢.



玩完印手手, 就去餐廳出面行吓影吓相, 剛好陽光有啲日落Feel, 好靚呀.



今日生日活都差唔多到尾聲啦, 影咗張大合照, 之後抽獎時莎拉仲抽到禮物呢.



今次活動搞手真係好有心思呀, 因為佢為所有參加既BB影咗張合照, 之後即時打印出嚟呢.



除此之外, 仲為每個參加既BB整咗個有自己名既小cushion呢, 另外仲有好多sponsor既禮物sample.



今日就開開心心玩咗半日, 第一次見到咁多BB都無扭計, 好彩陶寶B都無蝦人呢, 抵錫!

XO醬炒粒粒 (附有食譜)

夏天天氣悶熱, 食飯時真係有啲納口, 所以用嚟送飯既菜色都要清爽啲先啱胃口呢, 加上夏天都係食瓜食豆既季節呢, 所以呢個XO醬炒粒粒就啱晒夏天食. 每逢有炒粒粒呢碟餸, 就算唔係飯桶既莎拉, 當晚一定食一大碗飯呢, 因為空口食炒粒粒一定唔夠撈埋啲飯一切食咁正. 

材料:
豬肉碎 半碗
四季豆 15-20條
青瓜 一條
粟米粒 半碗
菜脯粒 2湯匙

做法:
1) 豬肉碎用鹽, 油, 糖, 生粉, 生抽, 米酒各少許調味備用.
2) 四季豆及青瓜洗淨後切粒.
3) 鑊中加適量油加一茶匙蒜蓉起鑊, 加入四季豆粒炒一會, 之後再加入青瓜粒快炒, 炒至7-8成熟後熄火, 盛起備用.
4) 鑊中加適量油加入菜脯粒, 之後再加入豬肉碎炒, 加少量米酒炒, 可以加少量水炒至熟透.
5) 加入粟米粒, 四季豆粒及青瓜粒快炒(不可以炒太久, 因青瓜會出水), 加入少許xo醬調味, 最後用少許生粉水埋芡即可.

13th & 14th month成長之路

成2個月無寫過成長記錄啦, 唔得, 莎拉要加油, 唔可以甩架!

13month及14month 成長之路

體重及身高:
之前同陶寶B去睇醫生時上過磅, 而家重10.2KG. 而一歲時返健康院時, 陶寶B係生長線既75%, 勁勁呀!!! 出世時得25%, 而家已經追到75%, 媽媽真係好開心呢. 希望陶寶B保持住呢個生長pattern就好啦.

食量:
都係維持住2餐固體及2-3餐奶. 午餐就多數食字母粉,而晚餐就食飯仔. 而家餵飯時比以前難咗, 時間用多咗, 而且食飯時仲開始心散, 不過大部份時間都可以完成一碗滿既飯或字母粉. 而味道方面, 仲未開始放鹽, 不過就會間唔時方一粒牛頭牌芝士落意粉. 另外如果食啲味道偏淡既食材(例如瓜或紅菜頭), 陶寶B就會食到洒手拎頭, 所以食材既配搭都要開始花啲心思呢. 今個月新試既食物有芝士, Yogurt, 西瓜, cherry. 一星期俾2次baby yogurt佢食, 次次都食到舐舐脷.

活動能力:
今個月真係大進步呀!
- 開始識行, 由自己放手企到行幾步到自己可以在屋企通屋行, 只係短短一星期, 小朋友學習既速度真係好驚人.
- 指令方面, 只係識錫錫, 而bye bye已教咗成個月, 終於見有一兩次好似揮手bye bye.
- 會係ask for help時才會叫"媽媽",  曾經聽過陶寶B叫"奶奶", 不過暫時都係聽過一 兩次.
- 明顯有自己既主見, 例如想玩既玩具唔俾佢, 佢會用力谷到面都紅晒, 跟住大叫已表示自己既不滿.

作息時間:
晚上約10pm瞓, 但半夜一定會醒, 之後就要抱佢上大人度瞓. 其實莎拉都怕會成為習慣, 但係如果要改, 就要半夜佢醒時, 暗佢一陣待佢熟睡後再放回BB床呢, 希望呢個同大人瞓既壞習慣可以快快改掉啦. 晚上食完奶後, 可以抱佢入房, 自己會碌吓碌吓就瞓, 不過就要有人係身邊陪佢呢.

健康:
打完一歲針後10天, 曾經發燒1天之後就身上出紅疹, 不過好快就沒有事了. 而13th Month 時就出咗玫瑰疹, 發燒4日, 最高去到39.3C, 之後就退燒, 再過一日身上就出疹啦, 發燒個幾日真係好擔心, 因為一日未出疹都唔知係咩事呢, 雖然發燒既幾日都食到玩到, 但脾氣就比較差, 不過總算都可以啦.
另外係13個月時發現陶寶B啲牙仔有黑色漬, 好肉酸呀!!! 試過開始幫佢刷牙, 但係啲漬都未能完全除去, 慘啦慘啦, 點算好呢?!試過用手指輕挖啲漬會甩少少, 上網seach過有關問題, 好可能係產色細菌引起, 不能完全避免此問題呢, 唔知有無媽媽遇過類似情況呀?
產色細菌文章: http://happypama.mingpao.com/cfm/parenting3.cfm?File=20080420/newa/oha2.txt

雞脾菇配香蒜意粉 (附有食譜)

咁多種菇類中, 雞脾菇都算係莎拉既No1至愛, 因為佢texture就算煮熟咗之後都好有咬口, 加上佢無唔會有一種菇既"up"味, 所以平時莎拉都好鍾意用雞脾菇炒餸架. 而每次煎牛扒時, 莎拉仲一定會用隻剛煎完既牛扒既pan炒菇, 因為啲菇會吸收晒啲精華呢.

而菇類既另一perfect match就係蒜蓉, 所以簡簡單單蒜蓉炒雞脾菇, 之後配上Pesto(香蒜醬) 意粉咁就又一好味晚餐.

平時食意粉唔係蕃茄汁就係白汁, 兩款都係有啲rich, 所以間唔時轉用Pesto Sauce都好架. 超級市場有啲一樽樽既pesto sauce, 所以其實真係好方便架, 啱晒莎拉呢啲懶人一族.

材料:
雞脾菇 2大隻
Pesto Sauce(香蒜醬) 1樽
意粉 2人份量
蒜蓉 1湯匙
橄欖油 適量
牛油 適量

做法:
1) 意粉出水煮好後, 盛起備用.
2) 加入少量橄欖油在鍋,中 之後加以3大湯匙Pesto Sauce, 加入意粉快手炒均, 可以加入少量鹽作調味後可上碟.
3) 在鍋加入少量牛油及蒜蓉, 用中慢火炒香後, 加入雞脾菇炒, 加入少量白酒, 之後煮至熟透, 鋪在意粉上即成.

加拿大親善之旅 - Montreal Day 3

第三日既行程, 莎拉約咗幾年沒有見既highschool好友同佢小朋友一齊去Parc Safari. Parc Safari其實係一個野生動物園+水上樂園, 佢既位置不是位於Montreal市中心內, 如果駕車都只係30min車程, 所以好方便呢. 而野生動物園既型式係有似非洲野生動物園, 遊客自己駕車沿住指定路徑, 而沿途會有好多動物, 遊客仲可以買定啲紅蘿蔔餵動物呢, 小朋友一定鍾意呢, 因為真係可以近距離接觸動物.

雖然Parc Safari係Montreal附近, 不過真係有啲失禮, 莎拉住Montreal多年都未去過呢, 因為去動物園呢啲咁親子既活動, 點會啱少女年代既莎拉呢. 所以今次第一次嚟點都要好似遊客係公園個招牌前影番張相.

約好朋友係Parc門口等, 但我地早到咗, 咁不如陶寶B係車上開餐先啦, 自己食飽飽再去餵動物.

呢盒好似Tempo包裝既就係動物cookie, 細細盒夠晒陶寶B玩.

而莎拉就負責扶住陶寶B係車窗睇動物及餵動物

齊人出發開車啦, 今日係星期日, 所以真係一大條車龍要慢慢開車呀. 好彩今日婆婆都嚟, 因為婆婆就負責做司機, 謝菲就負責影相

話就話係野生動物園, 但其實園內都有工作人員維持啲車既flow, 避免啲車停晒係兩條行車線搞到塞車. 一入到去就見到大笨象, 唱番首"大笨象會跳舞 馬騮仔會上樹",  襯晒陶寶B呀!


園內有鴕鳥, 斑馬, moose,仲有啲連莎拉都唔知咩名既動物, 而佢地基本上都唔怕人, 仲會沿住車龍去攞食物呢.






陶寶B都仲係細呢, 所以起初佢對啲企得太遠既動物無咩興趣.

但當陶寶B見到有動物係車附近, 佢就拍打車門, 好似想叫啲動作過嚟咁呢, 好好笑架. (我呢張相個樣仲好笑)

莎拉買既動物餅乾諗住佢地會食, 不過唔係種種動物都對cookie有興趣.

佢大部份動物地似乎鐘意食紅蘿蔔多啲, 佢都唔多"so"啲餅乾. 謝菲就剛好影到呢隻胃食鴕鳥食紅蘿蔔既食相呢.

期間有隻鴕鳥好大膽, 佢既然成個頭伸入車箱中, 佢似乎對陶寶B好有興趣呢, 陶寶B見到佢仲係度大叫呀. 呢個BB真係一啲都唔驚呀

成條野生動物徑差唔多用咗1hr先行晒, 行完就到我地大人食lunch啦. 嚟到Montreal就一定唔可以唔食Poutine, 因為Poutine係French-canadian既食品, Poutine 其實炸薯條上加上white cheddar cheese之後淋上熱辣辣gravy, um~~~~yummy啦, 因為食既時候, 啲半溶cheddar cheese加上薯條, 真係好味(食既時候千其唔好諗好肥呢樣嘢).

陶寶B同莎拉好朋友既2歲囝囝排排座.

婆婆做咗半日司機, lunch time可以同陶寶B玩吓啦.

食飽就學吓行路做運動, 幫助消化呀. 陶寶B學行路個樣好得戚呢.

大人們食飽飽之口就再去睇老虎, 獅子呢啲在籠中既動物.

莎拉都係第一次咁近睇老虎獅子呀. 陶寶B個樣好似好驚驚咁, 不過其實佢只係攰咋.



玩咗成日, 回程時一上車駛10分鐘就瞓咗啦, 今日勁放電, 到咗晚上瞓得特別"林", 咩時差都無晒啦.