2013/05/31

裝了IP cam的日子

一直以來, 陶寶B日間都係由婆婆及菲傭姐姐照顧, 所以好放心都無諗過裝IP cam. 但婆婆就好似候鳥咁, 到咗夏天就會飛返加拿大, 而冬天就返香港, 所以照顧陶寶B既重任就落係菲傭姐姐身上. 每日爺爺都會過嚟幾小時幫吓眼睇一睇陶寶B, 但似始終菲傭姐姐單獨照顧陶寶B既時間都多咗好多, 雖然呢位菲傭姐姐已經係家中照顧我地差唔多5年, 做嘢都算OK又自覺, 但係始終都係裝個IP cam安心啲.

莎拉唔係全天候開著個apps嚟 monitor住陶寶B既媽媽, 不過自從裝咗之後, 閒時係公司開嚟睇吓陶寶B就成為莎拉既娛樂, 因為發現咗好多陶寶B啲古惑嘢. 例如有一日見到陶寶B係網床度跳跳跳, 跟住仲想拿住幅窗簾食, 就係呢個時候, 陶寶B應該見到有人嚟, 所以佢就立即自己坐係網床內扮乖乖, 好似無事發生過. 真係每次見到佢啲曳嘢就好好笑, 之後仲要擺出一張naive樣, 真係俾佢激C. 愈來愈發覺陶寶B其實係隻馬騮仔呀!!!


2013/05/23

眼瞓大過天

真係好唔明解BB成日扭眼瞓呢個問題, 明明眼瞓架啦, 合埋眼咪瞓囉, 點解要扭嚟扭去呢?! 真係超級唔明白呢!!! 仲係新手P牌媽媽時, 初初揍陶寶B遇上佢極度眼瞓, 但佢又瞓唔到既時候, 真係搞到頭都暈, 企住抱, 企住搖都唔得, 真係投晒降, 而家諗起都怕怕呀

不過陶寶B而家大個咗啲, 熟咗佢既脾性就好咗好多啦. 當BB要瞓既時候, 就好俾佢瞓, 如果過咗眼瞓氣, 之後就會有機會好難"暗"佢呢. 每一次見到佢甜甜入睡既樣子, 真係好滿足.


同埸送上一段陶寶B好眼瞓, 釣晒魚既Video, 好好笑呢!!!

2013/05/20

BB影寫真 - AlvinYau Production

一直都好想同陶寶B影一輯BB寫真相, 因為仲襯佢而家仲叫做係BB樣, 好想留住呢一刻. 雖然謝菲有部單反機, 但係在家中自己影BB係唔容易既事, 光線係好緊要既因素, 二來同得BB影時, 自己就無得同BB影合照啦, 唔好話影全家幅啦.

不過太貴既影BB package 就唔會考慮啦, target係$800或以下, 仲要全部相俾返我地呢 (真係多多要求!!!!). 最後等了又等, 搵了又搵, 就係ball ball既blog度見到佢係Alvinyau Production (http://www.alvinyauproduction.com/)影咗輯BB相, 效果唔錯, 簡單是最美, 價錢又抵呢.

莎拉都拿拿臨Join咗 $600 既package (原價$888), 45min包3個造型(唔計自己帶嚟既造型), 其中10張相有Retouch, 呢個價錢真係連謝菲都話ok, 一致通過, 就搵Alvin啦.

2013/05/12

食果果

晚上當大人食晚飯時, 陶寶B就會座Booster seat圍檯座,  不過只係望住我地食晚, 佢就只可以玩手指, 或者俾少少星星餅佢食住玩. 但而家陶寶B大個啦, 圍檯座唔俾嘢佢食, 佢先無咁蠢呀, 當然開始識得扭計啦, 所以既然陶寶B上排開始出3仔牙仔, 都係時候可以俾佢試吓食啲大少少Size既生果粒等佢自己可以攞住食. 所以第一次俾陶寶B拎住嚟食既就係一條牛油果,


真係食到天一半地一半都不特只, 仲要成塊面及手都係牛油果蓉呢, 呢隻傻豬食到咁上下, 仲要走去用隻有牛油果蓉既手抺落個頭到, 正式成身都係晒嘢.

2013/05/09

大汗包

一直都覺得陶寶B係火熱之人(唔通因為係夏天出世既關係?), 就算係冬天時下午瞓晏覺, 瞓醒時有時成個頭仔都濕晒, 連同頭位既床單都濕埋, 真係好誇張. 而近日可能天氣開始回暖, 大汗情況有增無減, 夜晚餵完陶寶B食奶後, 成個頭仔都濕晒. 有朋友話可能係BB食得西藥多所以咁散而出汗, 莎拉都唔多肯定關唔關事, 不過好似好多BB都有類似情況, 因為佢地既體溫係比成人高呢.
呢個就係夜晚食完奶既wet look, 真係好似洗完頭咁!

佢個頭係濕到可以俾我地玩髮型, 襯濕濕地, 幫陶寶B梳個蛋撻頭先!!!

2013/05/07

Sophie陪洗白白

BB真係天生鐘意玩水, 以前陶寶B細個時, 沖涼前就算喊爆, 但當一放佢落水, 即時收聲及Calm down. 到咗而家大個咗(其實都仲係小BB), 會自己開心咁座係度拍打水面自己玩.

莎拉見陶寶B已經可以自己座係沖涼盤度玩, 係時候可以搵隻沖涼玩具陪吓佢洗白白啦, 本來想搵隻而家全城熱爆既黃色鴨仔, 但係搵唔到隻靚既, 係Toysrus見到有鴨仔賣, 但係啲color古古怪怪, 又藍又綠好肉酸呢.

咁啱莎拉前幾日係護協入貨時, 見到Sophie系列有隻係陪洗白白既小sophie($108), 穿咗個水泡既sophie好可愛呢, 除咗做型得意之外, 呢隻sophie仲可以係個口度噴水架,   莎拉見到當然唔放過呢隻小Sophie啦.

2013/05/05

Pat Pat 迄迄



BB學嘢真係奇快, 只係幾日既時間, 陶寶B由唔係好識自己企係身, 到而家已經好叻叻自己已經扶住梳化起身, 之後仲要好得戚咁係度Pat pat兩邊搖, 係咁係度un un, 仲要回敬莎拉一個古惑既笑容.



有時真係覺得陶寶B有啲似蠟筆小生, 好似個腦諗緊好多計仔去整古莎拉媽媽.



莎拉媽媽: 陶寶B你自己都知自己曳曳呢, 所以自己面地思過, 自我檢討呢?!!!
陶寶B: 你唔好傻啦, 我只係休息吓, 等緊下一round煩住你地咋!

2013/05/01

在家玩耍

2013/04/06
近排連續2星期都天陰陰雨檬檬, 無得出去室外活動真係好掃興. 難得約咗兩位好姊妹及佢兩個小朋友嚟莎拉家作客慶祝佢地4月份既生日, 本來book咗既BBQ都因天氣唔穩定要取消呀. 不過好彩下午時天氣好啲, 又有太陽不過就有啲風, 3位小朋友點可以屈係屋內玩呢, 所以就一齊去咗大廈平台玩吓.
陶寶B之前已經見過呢兩位姐姐架啦, 上次就無咩交流, 希望今次好啲啦. 今日陶寶B既烈火單車iimo出場啦, 係時候用嚟冧靚女.
 

街頭霸王street fighter


陶寶B對身邊所有既事物都非常有興趣, 真係咩都會去掂去玩.

就好似近來, 因為陶寶B好鐘意企, 所以就將佢放係網床度俾佢自己玩. 咁究竟放咗張捲埋咗既地墊係陶寶B旁邊, 會發生咩嘢事呢?!!!

陶寶B就好似葉問上身咁, 對住轆地墊係木人椿咁打, 係咁Attack佢當打緊街頭霸王, 呢鋪Game當然最後就梗係陶寶B win啦,