餵奶之路

陶寶B未出世時已決定餵母乳, 因為母乳係最適合及最好既營養給BB, 而呢一份同樣係媽咪俾BB既最好禮物. 但因為之後返工既不便(莎拉既工作係男人既世界), 極之唔方便泵奶, 所以本身都係打算餵2個月或直至沒有足夠既母乳便算.

但係原來唔係你想餵母乳就有得餵母乳, 之前以為生完BB後有母乳係好自然既事. 雖然一早已知道要盡快埋身餵以便可以上奶既呢個道理, 但係因為莎拉開刀生BB, 而陶寶B出世後就立即送咗去兒科病房佢觀察, 所有最後要係BB出世後差唔多48小時後先試第一次餵奶, 而之後要再過12小時先餵第二次, 所以莎拉一直都無谷奶既現象 (唔知係咪太遲餵及太耐先餵而影響奶量?!!!)

2nd month成長之路

係時候睇一睇兩個月既成績表先!

體重及身長:

二個月返健康院打針, 上一上磅先, 嘩陶寶B而家重5.28kg(11.6磅), 比起一個月之前體重進帳咗3磅呀!!! 唔怪得啦, 而家莎拉媽媽抱得耐, 隻手臂都有啲酸軟呀, 不過偽所謂啦!! 陶竇B好叻叻呀, 姑娘話陶寶B而家已經追返上生長線既Average, 咁即係中碼BB既Size啦, 進步得唔錯呀, keep going呀! 佢而家塊面珠仔有雙下巴, 姨姨仲話陶寶B既包包面好似Spongebob海綿寶寶, 佢傻傻地架!

朋友飯聚 - 神屋博多道場

暫時放下陶寶B交俾婆婆睇住, 等莎拉同謝菲"鼠"出去同成班朋友仔食個晚飯.
呢餐晚飯都算係座月後第一次同朋友出街食囉, 所以難得兩個人出街, 順便去行吓街"濕平"先得. 

一行9個人既飯局, 就揀咗呢間係尖沙咀既"神屋博多道場", 佢主打九州料理及串燒, 據聞有唔少日本人幫襯添.

人多食飯既好處就係可以叫好多嘢食, 所以樣樣都可以試一試. 當晚都唔記得Order咗幾多碟嘢食lu, 總之就係成檯滿晒啦.

陶寶B第一張證件相

雖然短時間內都唔會帶陶寶B出外, 但係襯有時間, 不如早少少幫佢整定啦, 橫豎遲早都要整.

原來好多影相鋪都唔會幫未識座既BB影Photo ID架, 所以就唯有去攞證件附近既影相鋪影啦, 因為佢地一定會幫BB影相.
(是關大把雙非強國人生完BB之後, 一出醫院就帶BB做證返大陸).

所以前兩日同陶寶B去健康院打完針, 見佢好精神, 眼仔碌碌, 不如去附近影埋張證件相啦!

去到影相鋪, BB就交俾佢地抱, 之後佢地就拉埋個廉, "叱o宅, 叱o宅" 兩吓之後就攪掂, 前後5分鐘都唔駛就影完相.

陶寶B已經相對幫襯既BB係比較大個架啦, 當時仲見到啲出世得幾日合埋眼仔既BB影證件相, 一樣都照影到無問題, 真係唔知佢地點影.

當然同BB影證件相咁難度高既嘢, 價錢就比普通大人影既會貴($100/12張), 不過都物超所值, 因為都影得幾靚仔.
(莎拉媽媽繼續自讚)

Heehee, 陶寶B既第一張證件相呀!!!! 影到陶寶B眼仔碌碌, 好精靈, 仲好似好大個仔咁款!!

Happy 2 months!

陶寶B話咁快就2個月大啦, 時間過得好快呢!!!
當然鍾意搞事既莎拉媽媽就之前又走去訂咗個mini-cake, 諗住要同陶寶B慶祝吓2nd month birthday. 上次滿月時陶寶B都未有名, 所以今次個蛋糕終於都可以唧上"Ethan"呢個名, 一個屬於陶寶B既birthday cake啦!!!
陶竇B今次2個月大對住個蛋糕影相既樣都比起滿月時醒目好多啦! 上之又喊又扭計!

爸媽惡搞之作 - 職業篇

自後有咗smart phone 之後, 真係時時候候都會同陶寶B影相, 再加埋啲整相Apps, 呢個係座月中既媽媽最佳娛樂.

無聊既莎拉媽媽同謝菲爸爸就創意無限咁整咗幾個不同職業既造型俾陶寶B試一試, 睇吓邊款Look至啱佢!!! 大家又認為邊個Look最正呢?!

第一款: Policeman
 陶寶B: "Yes madam!!!"

清潔三寶

家中有BB既屋企, 都一定要擺好個陣同BB換片片及沖涼, 所以莎拉都起咗個壇幫陶寶B換片片.
清潔第一寶: 換片床墊

之前都曾經諗過買唔買呢啲換片床墊, 因為橫豎都有成張床俾佢換片片架啦, 但係最後都決定買, 因為話晒張床墊兩旁加高, BB瞓係張墊上, 如果行開吓去開奶都會安心啲, 二來萬一BB換換吓片時玩"開大"及"痾尿尿", 清潔起上嚟都方便啲啦.  (因為莎拉試過俾陶寶B玩"噴C"及"沖茶", 真係玩C)

Baby懶瞓時刻

BB每日大部份既時間都係瞓覺豬, 所以每次食完奶之後都會打"喊路"想瞓覺, 啜吓奶咀又會瞓著, 最勁既境界係食食吓奶都會瞓著, 真係無佢符呀!

如果你想係佢想瞓覺時整醒佢, 佢啋你都傻, 真係天皇都無面俾呀, 照瞓呀!!!

BB車

終於都買咗架BB車啦!!!! 未生之前一直都唔買, 因為想陶寶B出世之後先睇吓實際情況先決定呢. 所以由陶寶B初生到而家差唔多兩個月, 都係用揹帶出街. 但係仲有兩星期莎拉要返工啦, 而婆婆就會幫手揍陶寶B, 所以為咗方便婆婆出入, 都係要買BB車呢.

睇咗Combi, Aprica, Peg perego, Chicco, 最近決定買Combi. 因為睇過Peg perego同Chicco, 雖然車內既空間係大啲同行起上嚟係平穩啲, 但係架車既重量真係太重啦, 唔好話老人家用啦, 莎拉自己一個攞都有問題呀, 加上試過按車既座位, 覺得唔多軟熟同舒服, 所以就out咗Chicco同Peg perego呢兩隻牌子.

之後再比較Combi同Aprica, 主力target中價BB車, 最後都係決定Combi, 因為其實重量嚟講, 呢兩隻牌子既車都輕身, 但係好似Combi既車比較平穩啲, 所以最後就買咗Combi既UR-350Z Sporty, 因為佢椅墊比較舒服, 加上鐘意佢既橙色車身好醒目, 係康嬰之城買價錢$2980, 但係有85折, 仲有現貨, 所以唔駛係護協order後要等!!!

heehee, 星期日天氣咁好, 最啱新車剪彩架啦!!!

1st month成長之路

時間過得好快, 真係話咁快陶寶B已經過一個月大, 係呢個月為咗方便記錄底陶寶B既生活情況, 莎拉係之前就print咗個excel表, 可以mark底BB食奶及大小便既時間及份量, 等自己可以清楚啲, 如果唔係有時真係唔記得佢上一餐奶係幾時食, 對上一次便便係幾時呢. 呢一疊Excel表代表咗陶寶B既成長里程架. 不如就寫番個成長之路, 等莎拉媽媽可以嚟個"中途檢討"!

洗白白

陶寶B出世到滿月時, 洗白白呢個重任就唔係莎拉做, 因為長輩們話座月期間唔好掂咁多水, 所以第一個月莎拉都係客串吓同佢沖涼! 雖然莎拉只係間唔少先親自同陶寶B沖涼, 不過都唔會雞手鴨腳呢, 可能因為之前上個啲實踐性既嬰兒護理班, 所以到自己親身幫佢沖涼時都OK, 唔係想像中咁難.

不過初生既陶寶B沖涼時, 係會比較扭計同比較驚, 因為差唔多次次同佢沖涼時, 陶寶B都係喊到拆天咁, 所以頭一個月沖涼時, 都係要快快手攪掂呢.

久違了的二人世界 - Hyatt Cafe Tea Buffet

因為莎拉好想二人世界食吓Four season hotel既hightea, 所以星期五謝菲專登請咗一日假, 點知一早我地就出咗去行街shopping, 買完嘢返屋企放底啲嘢之後就已經係3pm,  如果仲去four season hotel就好似太遲呢, 所以就臨時改去半島酒店啦, 點知一入到去Lobby見到條長人龍, 真係unbelievable, 估唔到Weekdays都咁多人, 不過睇真啲其實好多都係遊客, 有內地人, 日本人同外國人, 半島既hightea真係好出名呀!!!

於是乎唯有改地點啦, 尖沙咀食tea去邊度好呢?!!! 謝菲就提議不如去Hyatt Cafe食tea buffet啦, 之前食過佢既lunch buffet都唔錯, 而佢地甜品既種類都好多, 所以就拿拿林行過去Hyatt酒店啦.

BB面仔生粒粒

陶寶B出世後, 啲皮膚真係滑"LU LU", 好似雞蛋咁滑呀. 不過到咗陶寶B大約3星期時, 面仔及額頭就開始出現啲紅點粒粒, 初頭就得幾粒, 所以都無咩點理佢, 因為以為係奶癬, 所以只係諗住食奶後抺乾淨面仔啦.

點知啲粒粒越生越多, 成塊面仔及額頭都滿佈紅粒, 好似生暗瘡, 搞到面豬仔紅晒, 一"達達", 好肉酸呢, 最後仲係頸都出埋瘡仔呢, 雖然呢啲粒粒唔痕, 但係莎拉同謝菲好擔心, 因為唔知係咩原因, 於是上網就開始search吓呢啲係咩嘢, 因為有人話係奶癬, 又有人話係濕疹, 有啲人又話係熱氣, 而有啲就覺得係食既奶粉敏感, 真係N咁多個原因.

最後發現原來呢啲叫"新生兒痤瘡" (Neonatal Acne), 大部份既初生BB都有, 大約3星期開始出現, 維持約到3個月就無架啦, BB出呢啲暗瘡係成因係懷孕期間，媽媽荷爾蒙經胎盤傳畀BB ，令BB 荷爾蒙失衡而生暗瘡 (唔通呢啲就係胎毒唔清??!!), 但係緊記唔好唧唔好搞啲暗瘡, 佢地會自己慢慢好番, 唔需要特別睇醫生或搽藥. 而莎拉一個月時帶陶寶B返健康院時, 姑娘都話呢啲係"新生兒痤瘡", 唔需要擔心, 但係如果越嚟越嚴重的話, 就可以自己帶佢睇醫生.

雖然唔需要特別點樣理佢, 但係見網上有媽媽教用金銀花煲水(藥材鋪有得賣)或者莞茜煲水沖涼都可以改善生粒粒問題, 莎拉見煲水沖涼都無壞, 所以金銀花同莞茜都試一試啦! 試咗幾日之後, 唔知係煲水沖涼真係有效或者係咁啱得咁蹺啦, 用咗金銀花沖涼幾日之後, 啲紅粒粒真係"謝咗"及開始慢慢退呢.

第一次去健康院

陶寶B出院之後, 第一時間已經Book定第一次去健康院檢查既booking, 因為BB出世後既頭一星期就係黃疸病出現既高峰時期, 所以最好係出院後兩三日內返健康院Check黃.

第一次去健康院 (29/6/2012):

出院後第二日就book咗下午返油麻地健康院, 嘩,,,,,一去到健康院好似個街市咁又嘈又多人, 因為大部份都係內地人帶啲雙非兒童嚟檢查或打針, 所以如果plan咗會去油麻地健康院既媽媽, 記住book上午時段, 因為好好多架!!!

係健康院登記完之後, 就去磅重, 出世時有2.56kg, 之後出院時收水所以得2.49kg, 而呢日就有2.5kg, 體重不過不失啦, 比起出院時已開始輕微上升啦. 之後就去見姑娘及醫生, 度黃方面就有輕微黃, 不過就未算係好嚴重, 但係之後幾日會係出現黃既高峰期, 所以就要我地自己monitor住佢啦(因為個幾日係公眾假期), 如果發現bb黃既問題上升, 咁就自己直接去醫院啦. (跟住個幾日, 莎拉媽媽好緊張個觀察住陶寶B有無黃呢)

因為本身係餵人奶, 但因為奶量一直都唔足夠, 所以就安排去見姑娘教授餵人奶, 莎拉入到去就見到個中年既姑娘, 跟住呢位姑娘就話我"你無架啦, 你呢兩日都唔上奶, 唔駛只要有人奶呀, 你又餵得咁少時間, 無架啦!" 佢一路話我, 我就成個人呆晒, 好想喊. 之後就要我示範一之bb食母乳情況, 但係當時陶寶B個口又唔多合作, 唔張開口, 係呢個時間個中年姑娘係咁好大力"禁"BB個頭去我個Nipple, BB係咁好大聲喊, 莎拉心諗有無搞錯呀, 咁大力"禁"BB. 之後呢位姑娘就再話"你個BB咁硬頸, 佢都唔願食, 無啦, 你都係算把啦" "你地個個都話想餵人奶, 但就個個都係咁, 無架啦!!!" 係呢個時候, 莎拉已經眼有淚光, 因為佢講到好似係我錯咁, 好彩莎拉無產後抑鬱症, 如果唔係, 呢位姑娘咁negative咁話一個剛剛生完BB既媽媽, 真係好易俾呢位中年姑娘搞到Depress呀!!!!

所以一出到嚟, 謝菲見到莎拉個面口完全唔同晒, 佢都知唔對路, 不過好彩莎拉無比佢影響到, 心都係諗住"多與少都唔緊要啦, 唔夠就餵奶粉, 自己盡力餵到幾多就幾多!".

而陶寶B第一次去健康院都好合作呢, 大部份時間都係瞓咗, 做一個甜睡寶寶(係除咗果位中年姑娘搞到佢喊), 真係好乖乖呢!

Hello, My name is....

Hello, 大家好呀!!!媽咪今日終於幫我去咗攞出世紙啦, 佢地幫我改咗個名叫鋑邦, 而英文名就叫Ethan!!!

英文名就係我未出世時就一早已決定用架啦, 而中文名呢, 媽咪同爹哋就鍾意個音係"駿"既字呢, 所以之係我出世後搵人改名, 最後就用咗"鋑邦"呢個名呢!!!

Haha,, 媽咪, 點解我個中文名"鋑邦", 英文音讀快少少咁似"James Bond"既?!!! 你有無耍我架?!!!

 

我在座月的日子

莎拉懷孕至後期, 好多人都提醒及強調座月既重要性, 起初莎拉都抱住半信半疑既態度, 不過當自己真正座月時, 如果可能, 莎拉都會盡量去跟呢.

未生BB前, 一直覺得沒得出街一個月, 有如座監咁, 簡直係人都癲呀! 不過當自己真係座月時, 莎拉就發覺其實呢一個月時間過得好快, 唔經唔覺就座完月子啦, 因為每一日都係忙碌中度過.

生活篇:

基本上呢一個月既日子, 每日大約3-4HR就不斷循環做以下呢幾樣嘢:

幫BB換片片--->餵奶---->逗BB瞓覺--->自己休息

所以其實時間過得好快, 因為唔覺就又過咗幾個鍾, 又要重複啦, 所以呢段時間真係唔覺得悶呢. 而餵奶時睇電視, 上網及不停同BB影相已經係重點娛樂啦.
飲食篇:
因為莎拉係開刀既關係, 所以頭一個月都不適而進補, 而好多順產既媽媽食既嘢, 莎拉都唔食得呢, 一切飲食都係以清淡為主. 一日三餐都係"飯, 飯, 飯", 莎拉從來都無係早餐食早飯呢, 所以呢一個月內, 莎拉真係食番平時一年唔食既飯量, (以往莎拉唔多食飯架!!!), 正式成為一個不節不扣好正氣既飯桶呢!!! (因為啲人話食飯係正氣呀)