陶寶B嘆奶-Day 34

每次餵陶寶B食奶奶既時候, 佢都會好發出啲好得意既聲音, 好似話俾你知佢食得好滿足咁!
同埋佢又好醒目自己"旁"住個奶樽, 睇嚟佢第時大個都係為食仔一名啦!!! 

 

陶寶B滿月啦!!!!

陶寶B滿月啦, 同樣係莎拉出關既大日子呢, 好開心呀終於都放監啦, 莎拉第一時間就出街剪頭髮先, 因為本來諗住生之前剪頭髮, 但係陶寶B既突襲, 搞到未得切剪頭髮, 所以座月期間個髮型好唔爽呢, 唔好講咁多啦一出關就去剪個靚髮先.

因為覺得陶寶B得一個月人仔, 都仲係細太細個呢, 所以決定唔擺滿月啦, 只係兩家人出去食餐飯, 到時百日宴先攪大啲呢.

回到未生時 -大肚相

莎拉又要回一回帶, 返一返去未生陶寶B既時候先得啦.
呢批大肚相係生陶寶B前一個星期既時候影, 當時個肚都有37吋啦, 而家睇番啲相, 其實有少少懷念陶寶B係莎拉個肚入面既日子, 因為個感覺真係好奇妙.
而家陶寶B已經出咗世啦, 所以唯有睇吓呢批大肚相懷念吓啦.
呢次總共換咗4套衫, 3條長裙及1件Bra Top, 長裙有時都要佢既cutting, 因為好似今次3條中, 只有紅色果條先叫做比較特出個肚, 所以揀衫影大肚相都要有技巧呢.

廣華生B後之Follow up

之前一直對政府醫院既印象都係麻麻地, 總係覺得政府嘢好求其, 但係自從今次係廣華生完BB之後(廣華生B記(上); 廣華生B記(下)), 就覺得廣華既婦產科服務真係唔錯. 因為莎拉係開刀既關係, 所以出院之後會安排社區姑娘上屋企作家訪呢, 呢個Service真係出乎意料呀, 因為開刀後, 媽咪會有傷口痛既問題, 所以有姑娘上門follow up真係可以方便媽咪呀(好細心呀).
係廣華出院之前, 已經有姑娘嚟同莎拉Confirm出院後有社區姑娘上屋企家訪, 27/6出院, 已經安排第二日28/6有姑娘上門呢, 真係效率好高呀.
28/6一早9am, 姑娘已經到啦, 呢啲姑娘係明愛醫院派嚟架, 佢地除咗會幫媽咪洗傷口及拆線之外, 仲會檢查吓子宮收縮既進度. 另外姑娘都會問吓有關照顧BB既情況, 例如有無人幫手湊BB, 點樣消毒幻樽, BB食奶有無問題, 識唔識換片, 教媽咪幫BB洗肚臍, 餵人奶及幫BB探熱等等問題, 所以其實對一位新手媽咪呢講, 呢位家訪既姑娘就好似救星一樣, 因為可以將湊BB既一切疑問, 通通有人現場答你教你, 唔駛咁傍偟.
前前後後, 社區姑娘總共上嚟家訪咗3次(直至子宮已經收縮至正常), 每次莎拉都會問好多有關照顧BB既問題, 所以次次家訪都有成45分鐘架. 而收費真係好平, 每次姑娘家訪都只係收$80, 真係好抵呀!!!! 講真就算自己搭的士來回健康院都要$50-60啦, 但係而家人地上門都只係收費$80, 呢個醫管局provide既service真係好抵讚呀!!!

陶寶B究竟似邊個呢?!

由未生陶寶B既時候, 產檢照聲波時, 莎拉已經覺得陶竇B係似莎拉多啲架啦. 而家陶寶B出咗世啦, 有啲人就話似莎拉, 有啲人又話似謝菲.

不過莎拉始終都覺得陶寶B似莎拉呢, 特別係個光頭look同個鼻呢.

大家睇吓佢呢張o靚模第一式, 真係好搞笑(阿囝, 你係男仔呢架, 唔好擺咁多o靚模pose先得架)

陶寶B既十二朝 (Day12)

話咁快陶寶B就十二朝啦, 湊BB最辛苦既頭一星期已經過去啦. 而婆婆都係十二朝呢一日係加拿大返嚟香港見到佢既第一粒孫!

鬼馬既陶寶B嚟個"小朋友的祈禱"既Pose, 笑C莎拉媽媽啦.

陶寶B回家的第一天(Day 4)

係廣華醫院出院都已經係中午時分, 返到屋企就第一次餵佢食奶, 暫時都係餵佢食奶粉先, 唔知係咪佢個咀細及沒有太多力, 加上又食慣醫院啲奶咀(唔洗力都會滴奶出嚟), 所以返到屋企之後食ChuChu既奶咀, 陶寶B就食得好吃力, 不過因為莎拉想之後佢食吓人奶, 所以唔可以俾啲太容易食既奶咀俾佢, 如果唔係到時佢就之後唔很埋身食人奶呢.

廣華生B記(下)

入到去手術室, 四周既環境好冷冰冰, 莎拉瞓係手術床上, 只係望到頂上既手術燈及牆上既電子鍾. 醫生就問莎拉知唔知今次做咩手術, 之後就係莎拉身上駁上不同既儀器.

期間聽到啲手術用具互相碰撞既金屬聲音, 望住天花既手術燈, 加上姑娘再重提一次剖腹生產既風險, 問莎拉清唔清楚既時候, 莎拉既心就一直好驚, 雙腳係不由自主咁震緊. 可能姑娘見莎拉係咁係度震, 所以就問莎拉點解要開刀, 之後姑娘就話唔駛擔心, 佢之前生BB都同莎拉一樣催生後子宮口開唔到, 所以姑娘就安慰莎拉唔好緊張!

是次剖腹生產係用半身麻醉, 係脊椎之間打麻醉藥, 胸口對下就會進入麻醉狀態. 因為要係脊椎之間打麻醉藥, 所以莎拉要打側身及屈曲全身, 麻醉師會係每做一個動作之前同莎拉講嚟緊會做啲咩. 雖然麻醉師只係在背脊上查碘酒消毒, 可能莎拉真係好緊張, 雖然明知只係消毒, 但係一掂到個背脊, 就成個人震一震, 莎拉穩約記得麻醉師好似係脊椎之間打咗3次麻醉藥, 係脊椎之間打麻醉藥既感覺真係怪怪咁, 有些微既刺痛及赤痛既感覺.

落咗麻醉藥後, 大約幾分鍾之後就開始feel唔到子宮既陣痛, 係呢個時候成個人真係舒服晒, 因為痛咗咁耐, 而家一下子無晒痛楚, 成個人好似鬆晒. 之後麻醉科醫生就同莎拉做測試, 睇吓啲麻醉藥是否已經開始生效. 首先麻醉科醫生會叫莎拉嘗試提高隻腳, 當然啦, 呢個時候藥力已開始生效, 雙腳已經沒有力提起, 之後麻醉科醫生再用一支好似噴槍既物體係莎拉既手臂位噴一噴, 莎拉feel到係啲好強既凍風, 之後醫生再係雙腳及腹部位置噴一噴, 但係就只會感覺到好似有陣風, 不過就已經感覺唔到冷凍! 最後麻醉科醫生會問有否唔舒服, 唔知係咪麻醉藥既關係, 當落藥後, 莎拉係feel到好似想嘔吐, 但都只係維持咗十數秒, 之後想嘔既感覺已經消失.

Confirm麻醉藥已生效之後, 姑娘就開始係莎拉胸口位置用布擋住下身既視線, 之後就係手臂/肩膀位置吹啲暖風, 所以胸口對上既位置做手術期間係暖暖地.

一切準備就緒, 醫生就開始手術啦, 大約好似二十分鐘後, 就感覺到醫生好似係咁"挫"係咁"搖"我個下半身, 呢個動作大約維持咗有成1-2分鐘, 姑娘就係我身旁話醫生攞緊BB出嚟, 無幾耐, 就聴見手術室內幾個人同時叫出當時既時間, 跟住就聽到BB喊咗兩聲,  呢一刻真係好感動及好實在, 因為陶寶B終於出世啦, 莎拉都不其然流眼淚啦. 之後醫生就係上面遞BB過嚟, 叫莎拉睇吓係囝囝定囡囡. 當時只係見到眼前有一團灰灰及濕漉漉既嘢, 真係要定一定神先見到陶寶B既"古古"呢.

再過咗十多分鐘, 姑娘就將已經抹乾淨及包好既陶寶B遞給莎拉睇, 陶寶B開眼望咗莎拉兩眼, 莎拉錫咗陶寶B一啖之後, 姑娘就抱咗陶寶B出去給謝菲見一見, 之後陶寶B就送咗去兒料病房作觀察(雖然陶寶B超過5磅, 但係因為屬於早產加上不知有否感染, 所以要送去兒料病房)

醫生縫完針之後, 整個手術就完成, 之後就留係手術室大約30分鐘作觀察, 係呢個時候, 莎拉已經好攰好眼瞓啦, 因為足足20小時未真正入睡, 所以係手術室內不知不覺已經瞓咗.

完成呢30分鐘既Observation後, 都已經係差唔多1:00am, 之後莎拉就被推去產後病房, 而謝菲就已經係出面走廊等莎拉陪入產後病房. 完成好過床之後, 謝菲就攞番成個走佬袋幫莎拉set好晒個"架部", 謝菲陪咗莎拉一陣之後, 姑娘就要佢走啦, 不過好彩產後病房可以用手提電話, 所以都仲可以同謝菲傾一陣電話先瞓.

而莎拉都慢慢開始feel到下身有感覺, 麻醉藥開始慢慢退, 初頭莎拉都仲可以瞓到, 但2小時後, 莎拉就開始痛醒咗, 仲要成個人痛到不其然咁發震, 今次真係知道咩叫痛到震. 但係因為啲麻醉藥未完全退晒, 所以未可以打止痛針. 痛咗都唔知有幾耐, 姑娘終於嚟同莎拉打止痛針, 打完之後莎拉就瞓著啦.

到咗第二日(25/6)7:00am, 就有個嬸嬸嚟幫莎拉手面及清潔, 之後就有醫生巡房啦, 當醫生按未完全收縮既子宮時, 真係成個人都酸軟. 手術後既24小時都唔可以落床, 所以唔可以去兒科睇陶寶B, 唯有等謝菲用相機去影陶寶B俾莎拉睇呢.

雖然唔可以落床, 但就已經可以飲水及食流質食物, 醫院既流質餐真係極級流質, 唔可以講好難食, 但對於一個餓鬼病人成30小時都未食過嘢, 呢碗粥都已經唔錯架啦.


過咗24小時後(26/6), 莎拉終於可以落床啦, 第一吓用力, 真係好痛, 痛到入心入肺, 由床行去洗手間既路, 只係短短二十幾步既距離, 而家用咗差唔多成5分鐘先至可以"欄"到去, 一路行就一路傷口好痛, 就算每次上落床都會令到傷口位置好痛, 雖然有止痛藥食, 但都係會痛呢.

而落床後第一件事想做既就係去睇吓陶寶B, 所以就算幾痛都好, 莎拉點都要落去兒科病房. 一路痛一路行, 最後用咗15分鐘先行到去兒科病房(其實只係9/F去8/F)見陶寶B.

新生嬰兒病房每日都有幾個時間俾留院既媽咪可以入去餵奶, 莎拉第一次真正見清楚陶寶B及抱住陶寶B既呢一刻真係好感動及好實在, 眼淚就不由自主流出嚟, 因為眼前呢個BB就係莎拉同謝菲既Baby boy!!! 莎拉嘗試餵人奶, 但係陶寶B都唔食, 不過莎拉知道頭幾次一定係咁, 所以沒有氣餒!

呢一張就係莎拉係兒科病房影既第一張一家三口全家幅.


而經過2日係兒科既觀察及Testing, 陶寶B一切健康正常(YEAH!!!!!). 今晚9:00PM仲會將陶寶B上嚟俾送番莎拉自己照顧, 不過因為莎拉未上奶, 所以暫時餵唔到人奶, 因此當晚暫時交俾育嬰室照顧一晚.

27/6, 呢日早上經醫生檢查後, 莎拉可以中午後就同陶寶B出院回家啦. 而係出院前, 育嬰室會教媽媽們點樣餵奶及換片片, 而當日會出院既媽媽們, 醫院會安排姑娘講解出院後既需知及之後如何登記健康院等等問題. 而因為莎拉係開刀既關係, 所以之後會有社康姑娘上門跟進(洗傷口及拆線), 真係估唔到而家既follow up咁好.

總括嚟講, 莎拉覺得廣華醫院既姑娘及嬸嬸都好好人, 而醫生係就係Cool啲, 不過都沒有好求其既情況. 就係咁完成咗莎拉呢4日3夜畢生難忘既廣華生B之旅啦!!!

廣華生B記(上)

6月24日4:00am夜晚瞓覺, 瞓到好熟瞓既時候, 突然間"紮"醒, 因為感覺到下體好似有啲暖暖地既嘢流出嚟, 立即彈起身去洗手間, 心諗唔通穿咗羊水?!, 去完小便後, 企起身時, 下體都不斷流出水嚟, 心知不妙呀, 唔通真係而家生得?! 呢個時候, 莎拉真係好擔心, 心諗"閉啦, 而家先得WK36, 咁陶寶B咪早產!!!!".

謝菲見我去咗洗手間唔出聲, 問我又唔答佢, 佢都知有問題, 跟住莎拉就同答佢好似穿咗羊水, 謝菲呢個時候好震定, 反而莎拉就有啲騰雞!!! 好彩走佬袋叫做執好咗, 所以跟手攞銀包, 電話及電話charger就走人入醫院.

4:30am去到廣華醫院, 係急症室登記後, 就有個嬸嬸直接帶去9樓婦產科. 跟住有個姑娘出嚟就問莎拉, 幾點穿羊水, 而家幾多週及老公是否陪產. 之後莎拉就換咗條醫院裙及量血壓, 之後姑娘就叫莎拉係走佬袋攞起包衛生巾(其他嘢就會有人幫你銷入櫃), 然後莎拉就入咗去侯產病房. 而謝菲就只可以係出面等, 無得入嚟見無得入嚟陪!

係侯產病房內, 因為要用儀器聽BB心跳, 所以唔可以用手提電話, 而係出面等緊既謝菲就更加擔憂呢, 因為唔知道莎拉係入面既情況如何.

入到侯產病房後, 莎拉就駁上儀器聽BB心跳及量度子宮收縮, 當如果Feel到BB有郁動就按一下制. 等到大約6:30am就有醫生嚟檢查Check吓係咪真係穿羊水同BB個頭是否向下. 而因為莎拉都未得切做B鏈既檢查, 所以莎拉既Status係unkown, 加上WK36就穿羊水, 唔知道是否有感染, 所以醫生決定打催生針, 不過如果催生18小時後都未得, 咁就係催生失敗, 到時有可能要開刀.

其實係呢個時候, 莎拉好驚陶寶B有事, 因為唔知係咩原因令佢提早穿羊水, 加上佢始終都係未夠WK37(足月), 驚佢會好輕磅, 但係醫生就話基本上WK36, BB既發展已經係成熟, 所以唔需要太擔心, 雖然醫生都係咁講, 但係心裡依然係好擔心!

8:00am食咗醫院既早餐之後, 就行咗出去病房門口揾謝菲, 同佢講聲而家既情況, 之後謝菲就返屋企先, 因為佢要拿拿聲砌張床仔.

9:00am姑娘就嚟幫莎拉整粒"黃豆"準備落催生藥及吊鹽水, 因為之後就要禁食及唔可以落床. 期間一直駁住個儀器聽BB心跳及量度子宮收縮, 觀察住個進度. 落藥後既3小時, 莎拉都仲未feel到任何陣痛, 相比起左右床位既太太們, 佢地真係痛到"典床典席", 但都仲未可以聞笑起, 見到都真係好辛苦呢.

12:00pm醫生再嚟同莎拉檢查, 子宮口有否已經開始變薄, 嘩,,,,,醫生檢查子宮口呢一part真係好痛好痛, 莎拉都不由自主痛到叫咗出嚟, 經檢查後, 落藥後既3小時, 莎拉都未有反應, 所以醫生就將催生藥之劑量加大.

1:00pm到咗探病時間啦, 終於可以見到謝菲啦, 好掛住佢呢, 短短1小時既探病時間好快就過去啦, 謝菲成日都未瞓過呢, 雖然已經叫佢返屋企休息吓先, 但係佢令願係出面座, 辛苦佢啦.

3:00pm開始feel到有啲陣痛出現(個感覺好似Period痛咁), 但係都只係約20-30分鐘才痛一痛, 而同時間感覺到BB個頭開始向下墮, 頂住個恥骨位, 但係莎拉呢一啲痛都仲係好淺層既痛, 因為莎拉仲可以好輕鬆咁係床度睇雜誌, 所以醫生再次加大催生藥之劑量.

6:00pm陣痛開始加密, 大約5-8分鐘痛, 但係都未係太過有規律及陣痛未算強烈. 醫生檢查後就話子宮口已開始變薄, 不過進度依然係好緩慢, 醫生決定再加劑量, 不過已經係加到最大既劑量, 如果到時都子宮口都開唔到, 就要立即轉為開刀.

7:00pm老公係探病時間內既2小時, 陣痛開始明顯咗好多, 每次一痛就捉實謝菲隻手. 每次既陣痛大約維持1分鐘左右, 雖然姑娘已經話呢啲痛未夠劇烈, 但係莎拉已經覺得好痛好痛啦, 果種陣痛真係痛過M痛, 痛起上嚟只可以用深呼吸去減輕痛楚, 嘢都講唔到!!!

9:00pm醫生再次檢查, 最後子宮口都只係開得1度!!!! (頂!!! 我陣痛咗成10小時, 都只係開得1度, 如果要開到10度, 咁咪真係痛到暈!!!!!) 所以醫生都建議開刀生, 因為羊水已經穿咗15小時! 期間醫生就解釋開刀既風險, 例如開刀時有可能會整到BB, 又或者如手術中途出現大量出血便需要切除整個子宮. 雖然醫生已經講咗呢啲情況極少出現, 不過當時莎拉聽完之後都好驚, 唔知點算好, 因為莎拉好驚開刀時會整到BB! 所以醫生再俾多1.5小時俾莎拉, 睇吓子宮口有無機會可以開到3-4度. (不過其實莎拉都知好渺茫, 因為姑娘都話催生藥已經用到盡, 但係進度都係好慢, 所以情況唔多樂觀)

10:30pm經醫生檢查後, 子宮口依然係開得1度!!!! 最後簽字改為剖腹生產! 而姑娘就通知謝菲入嚟病房見吓莎拉及幫莎拉攞番啲私人物品. 其實係呢一刻莎拉係好緊張, 因為咁大個女都未試過入手術室做手術!!! 臨入手術室時, 莎拉仲望住謝菲眼泛淚光呢! (正一傻女!!!!)

與陶寶B一起的日子 - WK35 (影大肚相)

雖然陶寶B已經係WK36出咗世, 但係仲有WK35未寫, 襯我仲記得, 要回一回帶快快手寫埋呢篇懷孕記錄先得!!!
之前一直都唔肯定會唔會影大肚相, 因為一來驚自己影出嚟唔靚, 二來怕謝菲唔會陪我癲呢! 但係最後都決定點都要影一次, 因為都唔知將來仲會唔會生第二個, 影番啲大肚相當作係俾自己一個美好既回憶啦.

一直都對影大肚相無咩特別要求, 只係想簡簡單單, Simple is the best呀嗎!!! 最後就搵番Luva Production影, 即係結婚既影pre-wedding既攝影公司. 一來同佢地已經有默契, 影既時候會free啲, 二來阿石俾咗個special price我地呢, 真係thanks you thanks you呀!!!

陶寶B之降臨

莎拉已經與陶寶B出院回家, 今日剛好係陶寶B出世後既Day 7!!!

因為陶寶B只係WK36就出世, 所以佢比較輕磅(出世得2.56KG), 真係痛心C媽咪及嗲哋!!! 不過我地會努力湊陶寶B, 令你變為大隻B架啦.