2011/11/27

♫Oh 聖誕樹♫

Oh 聖誕樹, 托它歸家, 我阿媽話幾靚架

雖然而家只係11月尾, 但係莎拉同謝菲都已經急不及待開始佈置係屋企啦! 上年因為忙住搞結婚, 所以屋企都無咩點佈置! 今年一開始就想早啲買翻棵聖誕樹呢(早買早享受呀). 早兩年係log on見過啲新款光纖聖誕樹就念念不忘, 但係log on真係貴到無朋友呢, 所以當然唔會幫襯佢呢.
最後我地就係旺角托咗棵5呎高既光纖+LED聖誕樹, 之後就再係太子繽紛買咗啲裝飾品.

2011/11/26

九寨溝家家樂之旅-Day 4(上)

真係"晨早起床, 清新開朗", 0600起身已經係每日既指定動作啦. 今日中午就要搭飛機返成都. 但係點解都要咁早起身呢, 因為由九寨既酒店出返去九黃機場要大約2hr, 所以都係要早啲起身呢. 今早既天氣無前兩日咁好呢, 所以我地呢次既旅程真係好好彩呀!

咁早起身真係好眼瞓呀, 所以一上車又瞓覺, 真係正式既食飽就瞓, 瞓飽就食啦.

參加旅行團都知會被帶去買嘢, 心諗幾日都未有帶去買嘢, 今日原來就有呢樣"購物節目"呢. 行程表內所謂"西部地礦藏羌工藝館"咪就係入到去就有人負責介紹"天誅", "蜜臘"等等, 之後就入到去一個好大既展銷場, 有各種玉石, 天誅, 蜜臘賣. 係大陸買嘢當然可以打折啦, 打幾多折, 哈哈哈, 唔駛講價都已經自動原價3折啦, 不過啲天誅, 蜜臘件件打折後最平都成$1XXX, 所以成團人都係睇多過買. 不過導遊都無話迫我地買嘢.


睇完呢啲貴價嘢, 因為大部份團友都未有買過手信, 所以就帶我地去附近買啲土產作手信呢. 入面有啲用"毛"牛做既不同種類既牛肉乾, 青棵酥, 青棵酒, 等等等,,,樣樣都可能試食完之後先即刻真空入袋購買呢.

買完嘢就早早食我地係九寨最後一餐之後就去機場啦. 又係一餐清清淡淡既團餐呢, 不過都還都可以呀!

臨走前既最後一張相, 因為真係好鍾意呢度既天空, 天藍得很呀!!!

上機返成都出發去樂山啦!

2011/11/23

九寨溝家家樂之旅-Day 3(下)

九寨溝既空氣真係好純淨, 你可以感覺到一啲廢氣都無, 真係抖氣時都大啖大啖咁索多兩口呀! 我諗如果係呢度住番一兩個星期, 人都健康啲呀.
下午既第一站就去到"諾日朗瀑布", 其實見過今朝既珍珠灘瀑布後, 呢個諾日朗瀑布就相對變得小兒料啦.

之後就去到"犀牛海"及"老虎海"啦, 講真唔講真係分唔出邊個海打邊個海呀, 因為真係好相似呢. (莎拉都係打blog時去番個official website睇啲相先分到咋)

2011/11/21

九寨溝家家樂之旅-Day 3(上)

前一晚9pm早早就已經上床瞓咗, 所以今朝早上呢個6am morning call都仲頂得住. 酒店內既buffet早餐還可以, 起碼我唔駛食冷冰冰既嘢! 由酒店出發去寨溝大約30分鐘, 旅遊巴只可以停係入口附近, 行大約10分鐘就可以到公園入口.

2011/11/17

九寨溝家家樂之旅-Day 2(下)

食飽就開始"黃龍之行"啦, 因為比預定既時間早到黃龍, 所以我地有4小時既時間行山.

好啦, 未開始行, 整番張相先, 睇吓我地仲幾咁精神!!!

天氣真係非常好呀, 吸啖空氣都清新啲呀! 天空真係名副其實既天藍色, 一嚿雲都無, 加上位處遇高原, 所以紫外線係非常之強呀, 記住要係咁補防曬先得.


由黃龍既入口去到山頂風景區, 全程3.6KM長. 莎拉仲心諗有成4小時, 3.6KM應該無問題啦, 一定可以行到上頂 (遲啲莎拉就知死).
雖然已經出行太陽, 但氣溫都仲係零下, 所以樹上都仲掛住啲雪呀.

行上山既路用木做, 其實都幾容易行, 但係因為溫度低, 木板上其實係有一層薄薄既濕冰, 真係要好小心行, 一覺唔留心真係好易PK呀! 所以之前領隊提議我地買既行山杖係呢個時候真係好有用呀!!!

行咗約20分鐘就到第一個景點"迎賓池". 一級級既池加埋啲綠色池水, 真係幾靚呢. 不過唔知係咪天氣凍既關係, 眼見啲池水唔係好多, 水既流量都唔多.


一路行上山, 我地既動作都盡量慢, 行咗一小段就會企定定抖一抖, 等自己身體可以慢慢適應喔.
哈哈哈!!!! 氧氣for free, 你要唔要整口呀?!

行上山沿途風景真係好靚, 藍藍既天空, 白色既雪山, 一片黃綠色既樹林, 加上翠綠色既湖水, 呢一個畫面真係純天然既美, 不枉今朝早既4AM Morning call呀!


靚女+靚景=Perfect呀!!!! (唔知醜)

部份既湖水好碧綠, 原因係水中有大量既水澡呢.

呢個好似听"洗身洞", 一個好古怪既名!!!

開頭行既1小時, 都未算太辛苦, 可能因為景點比較多, 所以停落嚟既時間比較密, 因此身體都可以有足夠時間適應上升既海拔. 但後期既1.5小時就開始覺得辛苦啦, 因為山路越嚟越斜, 梯級級數越嚟越密啦, 所以莎拉呢個時候都開始有高山反應啦, 心跳急速, 見到既景物開始由彩色變成灰色, 耳鳴, 個人有啲暈眩, 係呢個時候就攞樽氧氣索一索啦, 嘩, 一索就真係無晒事啦, 真係好靈"kan"呀, 當初仲以為呢支嘢呃錢呢, 而家真係好彩有佢咋.

行咗總共2.5小時都只係行得一半路程咋, 因為高山反應開始明顯啦, 所以真係唔可以行得快呀, 最後我地最高都係行到去"明鏡池"附近咋. "金沙鋪地"就係我地呢次行黃龍既最高景點啦!

唔好以為上山難就一定落山容易, 雖然高山反應已經會減少, 但係因為始終係高山, 空氣比較晞薄, 所以始終都係唔可以行得咁急. 最後我地用咗成1小時先至行返落山呀. 行到落嚟, 成個人散咗!!!!

比預定既既集合時間早到咗, 實在太太太.......攰,,,,,,太太太,,,,,肚餓啦. 頂唔住啦, 真係要座座先掂呀! 集合位置既旅店真係好識做生意呀, 成個Lobby都放咗好多張椅, 但係要入去座就有min charge, 每位¥30, ~~~~~~唔理咁多啦, 我地3母女真在太攰啦, 座就座啦. 一人一杯紅茶, 每杯¥30, 另加一個康師傅杯麵, 埋單¥100!!!!

頭先係黃龍既呢4小時莎拉以為係最辛苦, 點知真係好戲在後頭呀!!! 由黃龍座巴士返去九寨溝既酒店需約2.5小時, 好多時有好多團友就會係呢一段車程出現較強烈既高山反應呢, 莎拉都唔例行, 係頭個1.5小時既車程, 其實已經好攰好想瞓覺, 但係當個頭一靠向座椅就好頭痛頭重, 而因為高山壓力下, 眼水仲會不由自主間唔時流出嚟(好似道友發作咁款), 真係瞓又瞓唔著呢, 間唔時就仲會聽到車上有人吸氧氣既聲音呢. (包括我地3個都有係度係咁吸!!!)

最後好彩都可以瞓一陣, 瞓醒既時候已經到咗我地呢兩晚係九寨溝既酒店"九寨天堂洲際大酒店".
成間酒店座落係一個大森林之內, 所以環境真係非常靚, 而我地住既房屋仲有露台, 望出去就係樹林及雪山, 夜晚仲可以望到星星呢.

房間既size都好大, 除咗有個露台仔, 仲有個客廳仔呢.

晚餐就係食酒店既buffet. 大家一定諗洲際既buffet一定好得啦,,,,,sorry, 錯啦, 食物都係好普通, 因為又係個句"啲食材係出面城市運入去", 所以絕對係麻麻地. 不過咁, 當然比我地下午個餐好好多(起碼唔駛食杯麵), 莎拉呢一碟係回窩肉呀!!!

酒店內既超市叫天堂超市, 哈哈哈, 好似好唔老黎咁,

因為氣壓關係裡而所有既包裝食物全部都脹卜卜, 好得意呀!!!

食飽就早啲返房抖啦, 因為明早既morning call係6am呢!!!

2011/11/14

九寨溝家家樂之旅-Day 2(上)

個頭沖完涼, 呢頭真係床都未瞓暖就已經要起身啦, 因為集合時間係4:30AM呢, 臨瞓之前打去Front desk度落個4am既morning call, 連個服務員都以為佢聽錯呢, 後尾再三講一次先ok呀!!!
4:30AM準時拖住行李出Lobby集合上旅遊巴, 領隊就每人派一盒酒店既早餐盒!!!

打開裡面, 有2件蛋糕, 1個包, 1隻烚雞蛋, 1杯乳酪, 1個桐仔, 1支水, 成個早餐盒都係冷冰冰架, 真係睇見都唔係好想食呀!!!! 所以最後莎拉都只係食咗個2件蛋糕就已經放放棄咗個早餐( 之後莎拉就極其後悔啦!!!!)

2011/11/13

九寨溝家家樂之旅-Day 1


 今次係莎拉第一次參加旅行團, 所以就唔係太需要做啲咩功課咁, 只係出發前領導提醒我地要帶足夠既衫(因為高原地方會比較凍, 預計2-3度), 買定啲朱古力及糖(對舒緩高山反應有幫助), 買定一至兩個杯麵(吓, 唔係要食杯麵咁慘呀?!), 最後就係買定支行山杖(因為可以借吓力).

2011/11/11

生日晚飯 - 秋田日式鐵板燒

話說之前係facebook度曾經見到有啲朋友去咗一間日式鐵板燒既餐廳, 個廚師會用炒飯既材料去砌啲公仔圖案, 好鬼得意呢, 於是就去openrice度search呢一間餐廳, 原來呢間鐵板燒叫"秋田", 再望一望啲價錢, 真係嘩咗一聲呢, 因為真係好貴呢, 無咩特別原因都睇怕唔會嚟食,  所以呢間餐廳一直都係我個"must try" list度.

2011/11/07

陶太的第一個生日

Heehee, 剛過去既星期五係莎拉既生日, 陶太既第一個生日喎, 謝菲不敢台慢呢,,,
本來真係想同老公一齊請假慶祝吓, 但因為啱啱先請完假去九寨溝, 所以真係無可能再請假啦!!!
雖然星期五先係正日, 但係星期四已經同屋企人係屋企食番餐好味住家飯當慶祝(媽咪話生日一定係只可以預祝, 唔可以補祝呢)!!!
到咗正日就一放工就拿拿聲走人同老公食飯, 過咗一個好開心既晚上!
今年既生日, 謝菲真係well prepared (唔知係咪我去咗旅行, 佢有多啲時間去準備呢), 真係要俾個like佢, 因為佢俾咗3樣我"恨"咗好耐既禮物俾我!
第一就係我"恨"咗好耐既Tony Wong既玫瑰蛋糕!


2011/11/04

莎拉返嚟啦!!!

我返嚟啦!!!

各位Blog友及朋友仔有無掛住莎拉呢?!!! 其實我已經返咗嚟香港2日架啦, 但係個人仲未回魂呢 (其實係成個人散晒就真), 加上今日係莎拉牛一, 所以排山倒海既節目一浪接一浪, 而明天就又係我公公既大壽, 所以明天又要返大陸賀一賀呢, 因此都未有時間update吓呢!!!

不過實在唔update唔舒服呢, 所以係咁易打幾隻字, 加上真係好想同大家分享吓九寨溝既靚景, 所以post住一張莎拉帶住Homer Simpson 係九寨溝影既相先呢!!!