Wedding vendor review - ArShek 阿石 (MUA)

係時候輪到開始寫商戶評分啦!

**************************************************
商戶: ArShek 阿石(AS Makeup)
評分: 5分  (最高5x)
**************************************************

尋找大婚當日既MUA, 基本上心中有幾個條件:

1. 價錢要適中, 太貴既莎拉唔捨得俾, 太便宜既又驚証對方有詐.


2. 化妝及髮型路線主要走清簡及自然既MUA, 莎拉頂唔順啲誇張既STYLE, 最怕俾啲賓客覺得妝後係第二個人既感覺.


3. 有口碑及最好有朋友曾經用過既MUA, 衰極都有個譜, 起碼知佢有無遲到問題及轉妝快唔快手(因莎拉做姊妹時曾經見過MUA遲到成30分鐘, 又見過MUA晚宴時轉妝太耐, 打亂晚宴既流程)


4. Nice 唔nice啦, 呢個真係好空泛, 真係人夾人緣啦. 最怕見到寸寸共既MUA, 因為當日除咗要幫我化妝,重要同啲媽咪化妝呢. (莎拉曾經見過MUA可以同個攝影師及大妗姐鬧交, 真係嚇C你)


5. 最好之前已經合作過, 咁樣默契會多好多.

綜合以上5大條件, 心中一早已經敲定人算啦-----就係AS Makeup (前名Luva Production)既阿石(ar shek).阿石係因為之前做好朋友伴娘時, 就係阿石幫我化妝, 而眼見佢化既妝都好自然清簡, 轉妝都好快手, 加上當時都join咗AS Makeup既pre-wedding photo, 咁樣默契自然就會有,所以當我第一次試妝之後, 就已經confirm咗佢為大婚當日既MUA啦.

"果"然係"樹"

星期六日番咗上大陸, 早上搭9am既巴士, 番到碧桂園都已經係12:30pm啦, 天氣真係好熱呢!!! 

一入到花園, 除咗有我隻可愛狗仔bonbon外, 仲見到之前爸爸種既果樹有好多果實啦!!! 真係前人種果後人食呀!

最開心就係見到呢棵荔枝樹, 種咗都有3年啦, 今年係第一年有荔枝呢, 雖然果實唔多, 但係味道都唔錯呀, 唔係太酸, 食得吓呢! 唔知大家細個既時候, 有無試過番大陸摘荔枝呢, 啲老人家仲話食樹上即摘既荔枝係好"火", 好燥呢! 仲勁過一粒荔枝三把火呀!

父親節快樂不快樂

今日係父親節....今日同樣係爸爸去世後既一百日. 是巧合嗎????! 幌忽好似往後的父親節已經與自己無關, 因為已經再不能親口說句"父親節快樂".

時間的而且確是一種靈丹妙藥, 給心靈最佳的治療. 雖然家人不需要跟足所有傳統中國白事既儀式, 但好歹100日之後的今天好像要給自己一個Restart了!

不知爸爸能否見到或聽到, 只想講一句"老豆,父親節快樂, miss you so much!"

 

原來已經結婚半年了

唔覺唔覺已經結婚半年啦!!!!本來一早諗咗會出街食飯慶祝吓, 但因為家中有事要辦, 星期六正日要上大陸呢, 所以就不如提前一日留係家中慶祝啦 (出面落雨C濕, 都係在家千日好).

同謝菲一早諗咗叫外賣, 哈哈哈, 好耐無叫Delivery啦. 今晚就order咗California Pizza Kitchen, 係屋企食pizza就係最Free, 今次order咗The Works, Classic Caesar salad 同兩個湯, 好味呢, 最鐘意啲pizza個批或唔會好似pizza hut咁, 食到成手油, 食完都唔會飽飽滯滯.

蝦兵蟹將-Conrad Hotel Garden Cafe

星期日family day, 原來媽咪每次番HK都無同佢食過Buffet呢, 一係就唔食, 要試就試啲正嘢. 今次出動既目的地係Conrad Hotel (港麗酒店)既Garden Cafe.

相比起Shangri-la既Cafe Too, 呢間容易好多book位, 雖然當日後來Cafe Too都位, 但既然未試過Garden Cafe就不如試試啦. (本來帶咗部DC影相架, 點知一打開, 無帶電呀, 所以唯有用iPhone影啦, 所以啲相既質素好差呢)

Wedding vendor review - Luva Production (Studio Pre-wedding攝影)

係時候輪到開始寫商戶評分啦!

**************************************************
商戶: Luva Production
評分: 5分  (最高5x)
**************************************************
當初吸引我係Luva Production影pre-wedding既就係佢studio既pre-wedding相. 而我影完studio及outdoor後, 我依然係鐘意Studio個啲相多啲. 因為沒有任何既背景及風景, 主角就係我們, 啲相望落下仲好似襟睇啲.

大家有影Pre-wedding既Blog友仔都會感到, 開頭影既好可能唔係太過自然, 而影影吓就會進入狀態. 所以我係studio開頭個啲都表情比較生硬呢, 但到後期就會越影越顛! 攝影師Andrew都會俾啲意見, 等後期可以整到啲連環圖既相, 讚呀!

影studio既相, 可以發揮你無限既創意(我睇個佢地個blog, 裡面有其他新人帶咗好多得意既道具, 影到好有創意). 我地當日就係帶咗個拳套, 就所以有呢張"謝菲俾我打"既驚世之作, 等老公可以常常銘記在心!

千裡尋"框"

搬入現時居所都差唔多1年半啦, 家中沒有太多既裝飾, 而牆上沒有任何既decoration, 望落去有啲Dry Dry地, 所以一直想搵一個大相框, 可以放好多好多張相. 前前後後搵咗半年都未搵到心目中既"框", 一係唔係太貴, 就係可以放既相唔夠多.

當我正諗住屈服係個好貴既相框(成$1000呀)之際, 媽咪係加拿大既Wal-mart見到個$19.99加幣既框呀, 好大個好平呀!!!! 咁平, 維番都係約$160港幣咋, 真係一個8R靚啲既座檯相架都唔至啦! 正好媽咪6月份番香港, 於是乎就決定買一個博一博, 包到實一實就當行李咁寄艙.  好彩安然無恙, 安全到埗!!!

琴晚正式上"框"啦!! 靚晒呀, 不枉我之前忍手唔買個貴相框, 等我遇到呢個平靚正!

個相框總共可以放21張4R相, 我地就中間3張放咗結婚當日既相, 而周圍就放晒我地旅行既相啦!!!

Wedding vendor review - Joyce Pang (結婚證書套)

係時候輪到開始寫商戶評分啦!
**************************************************
商戶: Joyce Pang
評分: 4.5分  (最高5x)
**************************************************
結婚證書套呢個items, 我真係極之last minute先去買, 因為一心諗住唔太難買, 點知到結婚前2個月先去搵既時候, 原來啲大熱handmade既結婚證書套係要好早落Order架(例如"盟"), 真係臨急抱佛腳啦.

好彩之後係網上就搵到Joyce Pang既handmade結婚證書套, 係佢個blog度有不同既款式. 雖然款式唔算太多, 大部分既都係簡單及清清地既style. 而價錢又唔係太貴($22X, 如要繡字另加$80), 於是就一拍即合啦, 由落Order到取貨大約係2星期.

手工及用料都幾好, 自己認為base on呢個價錢, 都唔錯啦.

入面就係左邊放相, 右邊就放結婚證書既standard方式.

Wedding vendor review - 現代經典 (Pre-wedding攝影)

係時候輪到開始寫商戶評分啦!
**************************************************
商戶: 現代經典
評分: 3.5分  (最高5x)
**************************************************
酒店送既$2500攝影套餐, 其實嚴格嚟講都稱唔上係套餐, 因為包既嘢少得可憐, 連softcopy都唔包, 所以最後都係加咗錢去upgrade個plan. 呢個pre-wedding主要都係影室內影樓, 相比起其他大熱既傳統婚紗攝影法國婚紗或蒙羅麗莎, 現代經典相對比較少人影, 所以熟口熟面既相都比較少呢.

佢既婚紗及晚裝選擇都幾多, 如果只係Package揀一婚紗一晚裝, 應該問題不大. 而化妝方面就真係偏濃, 上咗鏡都覺得濃, 可想而知當時真人有幾濃妝嚇人啦! 而做形都係比較Standard old school個類啦. 都係個句, 酒店送既無所謂, 但如果成個package自己買就真係唔會join啦, not my cup of tea!

室內有大約20個不同既場境, 而當日4小時既拍攝, 就揀咗約10個場境. 攝影師個名唔記得啦, 但佢既服務態度都幾好呢, 雖然對佢嚟講, 每日都係影埋同一樣既嘢, 但佢俾我既感覺都唔會話好是但呢.

到揀相個日啦, sales唔會好hard sell 係咁說服你買相, 就算even我最後都只係加咗好少錢佢都無黑面. 呢個要讚!!!

整體佢化妝, 攝影及sales既服務態度真係唔錯, 比我想像中既好.

呢兩張, 我諗係比較"現代經典"既代表作. 其實我都幾鐘意呢張9格相, 但呢張就要另外加$350, 不過都可以接受.